着拖鞋行山得唔得 ? 有人話得，有人話唔得 !
縱橫山野，有對靚(唔係美觀)鞋，梗係如虎添翼，揮灑自如啦 !
每當有山野意外發生，專家學者就會同我哋講，要選擇適當嘅行山鞋(仲有好多佢哋鋪頭有得賣嘅裝備)啊 !
近年行山廣告吹谷，都將行山鞋(仲有好多裝備)提升到神級 !
咁講法，着拖鞋咪變咗離經背道 ? 出咗事，點算好 ? 不過根據非正式統計，着拖鞋行山嘅出事率絕對唔高，反而睇返歷來嘅山野意外，事主絕大部份都唔係着拖鞋嘅。
為咗驗證着拖鞋行山得唔得，個人喺今日做咗個試驗，踢對人字拖上老虎頭(465M)，不過就絕對唔係貿然行事。首先，事前每年六月上梧桐山，行完之後都係着拖鞋返屋企。噚日紅雨之後，仲有車唔搭，由瑪麗醫院經域多利道行返堅尼地城，試過效果滿意，先有今日嘅行程。當然，冇事返到落嚟梗係多嘢講，上都上唔到頂咪頭耷耷囉 !
其實做乜要歧視拖鞋啫，話哂佢都係真.鞋，仲好通風，合乎衛生。不過係咪適合所有行山人士，咁就見仁見智，要自行判斷嘞 !
孤芳集 