遊記

虎頭四秀 (210104Facebook)

  為咗行完仲有晚飯堂食,可以去到幾盡?早啲起步囉,邊個叫你行得慢啫!食完早餐,七點落樓上老虎頭,東崖堆亂石好耐冇玩過,竟然畀人行咗條路出嚟,頂上面個墓,前面啲雜草都畀人踩死哂,喺度野餐都得。前日二白坳上老虎頭,趕住出東涌食飯,冇上到頂,今日補返數,Q咗今年第一枝標。
  全走老虎頭郊遊徑,中途上埋望渡坳枝標,多年宿願,一朝得償,上去嗰陣,樹叢有個虎頭蜂巢,好彩啲蜂未瞓醒,先至幸免於難。出到奧運徑涼亭,遇到一位走雙極嘅年青人,一齊行咗一段,跟住畀佢抛甩係必然。條路明顯咗好多,唔使點搵,沿筆直嘅山路上鴨腳瀝,回望返老虎頭,何其渺小,就嚟到頂,又見返頭先位年青人,佢要休,我繼續,頂上接大路續上蓮花山,人影都唔多個。
  落雙東坳接鳳徑,開始見人流,但亦止於上大東個路口,大東頂落返鳳徑,跳板石始終係集結人氣嘅好地方。下走伯公坳途中,大東山一號觀景台峻工,登臨攬勝,嶼南景色盡收眼底。逆住上山人流落山,雖然有啲肚餓,步伐尚算輕鬆,落到伯公坳,用咗五粒鐘。
  食完午餐上鳳凰,今次唔見有人玩滑翔傘,想停低影相順手唞吓都冇機會,捱到上頂,好旺場。影幾幅相走人,天梯落昂坪,人流不絶,出昂坪高原牌坊前見返走雙極嗰位年青人,心經簡林外同聲道別,分道揚鑣,睇返時間,鳳凰山用咗個半鐘,似乎快咗啲。
  東山法門緩步上彌勒,一路行一路諗點撤退,由於上次行救援徑,今次不如改變吓,最後決定揀法門古道,貪佢快,早知調轉行咪慳返啲路程囉!登頂後不走回頭路落山,經銅鼓石出昂坪,順手影番幾張工程中大佛相,跟住匆匆落山,不能怠慢,行遲半步,唔使食飯。

二零二一年一月四日
愉景灣,老虎頭,老虎頭郊遊徑,鴨腳瀝,蓮花山,雙東坳,大東山,伯公坳(大休),鳳凰山,斬柴坳,東山法門,彌勒山,昂坪,東山法門,地塘仔,東涌鐵路站。(28.8km)

標準
遊記

青山天水 (201228Facebook)

  屯赤隧道通車,大大縮短屯門同大嶼山之間嘅車程,巴士開通首日,東涌試搭E33,0750泳池開車,未到裕東苑站樓上已滿座,心諗佔咗上班人士一個座位,真係有啲歉意。一出隧道,青山隨即影入眼簾,轉車站後,見迴旋處山邊全被鐵絲網圍封,弊!0811屯門騎術學校落車,回走龍門路上龍富路,過迴旋處希望搵到路上山,見有警車同好多採訪車泊喺度做嘢,唔好諗嘞,褪返轉頭,見鐵絲網有破綻,擺明就係登山口啦,呢條巴士線,似為東涌過嚟上青山度身訂做!
  背住冬日偏南嘅太陽上山,路唔算難行,仲有東風相伴,按自己步伐,沿途影吓相、上吓Facebook、出吓Whatsapp,尚算輕鬆。青山頂冇上過好耐,次次都喺下面過,今次早,未見人流,跨過主峰落韓陵片石亭,隔籬個晨運點比以前有規模咗好多,最驚愈做愈靚,好過政府嗰啲,就一定畀人撲殺,功高蓋主嘛!
  繼續前行,就係無論你由蝴蝶灣或青山寺起步都必經嘅杯靈雙渡路線,呢條路好多人都會用浮沙碎石、窮山惡水去形容,其實呢啲先真正係郊野而唔係公園,冇乜人工修飾,全部都係經大自然力量同埋遊人屐痕去打做嘅地形,入得嚟,就要靠自身能力去應付,唔好寄望有乜設施可以幫到你。
  經良田坳、乾山到圓頭山,已過正午時份,趁有樹蔭,舒舒服服喺度食個午餐,攪掂沿北坡下撤,呢段啲鐵鏈都幫到好多落山嘅人。過電塔,唔落靈渡寺繼續前行,穿港深西部公路橋底上雞伯嶺,落返沙江圍,有間聯益廢校,竟然入到去。最後上埋天水圍山,Benson Lai 喺度守候多時,Q埋兩枝標,落返天恆巴士站,仲夠時間搭車出深水埗食「晚」飯同採購物資。

二零二零年十二月廿八日
屯門騎術學校,龍門路,龍富路,青蝶脊,青山頂,良田坳,乾山,圓頭山(大休),港深西部公路,雞伯嶺,沙江圍,天水圍山,天恆邨巴士總站。(21.0km)

標準
遊記

廟走屯門 (201223Facebook)

  屯門、掃管笏一帶,五座天后廟,一座觀音廟,一座關帝廟,仲有因疫情暫停開放嘅聖廟,加埋啲燈標,天南地北,似足玩定向,咁就玩咗一日。

二零二零年十二月廿三日
屯門湖翠路北,蝴蝶灣望海觀音,319標,屯門海濱花園,屯門避風塘西堤尾189燈標,口角天后古廟,聖廟,青山三洲媽廟,青山灣海濱長廊185燈標,嘉道理碼頭K10燈標,黃金海岸海豚廣場74、75燈標,掃管灘天后古廟,掃管笏關聖帝宮,掃管笏天后古廟,小秀村天后廟,青山公路。(20.3km) 

標準
遊記

千島楓香 (201221Facebook)

  千島湖清景台呢個景點,開張之後未曾到過,雖然同九徑山望落去差唔多,但勝在易行。楓香林日日話好多人,但係入冬以嚟都冇去過,口痕喺朋友面書上留言話好想去,總要找數。
  是日冬至,天文台如常發出寒冷警告,趁屯赤隧道通車前,東涌仲有巴士去大欖涌,的起心肝攜眷去行番轉。非假日巴士客少,搭三個站好快就到屯門公路轉車站,經小欖上水塘,沿途冇乜人,去到麥十掃管笏上嚟個路口先見人流,愈行愈多,好似仲多過疫情前嘅假日。
  上到清景台,人山人海不在話下,各據有利位置攞景,宣示到此一遊,路面沙塵滾滾,仲以爲入咗地盤,衆地勿企,怱怱走人。落返麥十,經過二坳仔同西白虎坳兩座小廟到楓香林,遊人如鯽,雖然唔係漫山紅葉,都可以影餐飽,反正去唔到日、韓賞楓,咪止住咳先囉。落斜去吉慶橋,中途都有啲幾紅嘅,仲唔使同人逼。
  吉慶橋出大欖隧道轉車站,有三個選擇,捨難取易,順便Q埋兩枝標同去埋馬鞍崗座小型天后廟,輕輕鬆鬆到轉車站,又一日行程。

二零二零年十二月廿一日
屯門公路轉車站,小欖,大欖涌水塘,麥十,千島湖清景台,二坳仔,西白虎坳,楓香林,吉慶橋,七渡河,馬鞍崗,大欖隧道轉車站。(15.9km)

標準
遊記

田下魚翁 (201207Facebook)

  儘管疫情嚴峻,都要生活如常,車船聯運由大嶼山去到清水灣半島康城站起步,諗住上釣魚翁,點知峻瀅後山擋土牆維修緊,此路不通。退而求其次,環保大道行過大赤沙上郊遊徑,順路Q埋大赤沙枝標,到頂時見一洋人又喺度影緊枝標,交談之下,原來係同好,不過佢用紙地圖搵標,咁就梗係介紹個網上地圖畀佢啦!傾傾吓,May May Chiang 又係因為封路關係喺相同方向上嚟,傾兩句加合照之後就各奔前程。
  入到郊遊徑向南行,Q埋田下山枝標先去大廟,安心出行碼無孔不入,大廟有不在話下,連公廁都有埋先盞鬼,大廟碼頭有燈標同潮汐站,順便落去睇吓人釣魚。上返大廟坳落布袋澳,好耐冇嚟過,除咗間洪聖宮,其餘冇乜印象,布袋澳咁細,都有兩個有燈標嘅碼頭,有間福德祠,有間廢棄嘅南燊學校,當然仲有好多海鮮酒家。
  下一站大坑墩,長長嘅馬路,都係搵小巴代步,可以慳返啲時間臨尾行出地鐵站。搭咗程車,大坳門去大坑墩就唔覺遠,上到全港最有氣派嘅測量控制點,見人多影唔到相,咪食咗嘢先影囉,冇瓦遮頭,啲人唔捱得幾耐曬太陽啫。搞掂哂續上鵝死雞、大嶺峒,點到即止落返大坳門,跟住上返今朝冇上嘅釣魚翁。
  士多後面上山,為咗慳時間,決定由東脊上,東崖個路口,有心人拉哂尼龍草,提示一般人咪亂闖。上到頂,好多人喺度流連,平日都咁,假日真係不堪想像。人多地方,不宜久留,過埋廟仔墩,接返郊遊徑,孟公屋落坑口站,咁就一日行程。

二零二零年十二月七日
康城站,峻瀅,環保大道,大赤沙,大赤沙脊79M矮標,大赤沙(205M),郊遊徑187M矮標,田下山(273M),大廟,大廟灣碼頭(S14),布袋澳,洪聖宮,布袋澳碼頭(S13),布袋澳二號碼頭(S5),南燊學校,布袋澳小巴站。(9.06km)
大坳門,大坑墩(104M),餓死雞(263M),大嶺峒(291M),大坳門,釣魚翁東脊,釣魚翁(344M),廟仔墩,孟公屋,坑口站。(10.2km)

標準
遊記

銀洲赤洲 塔門高流 (201130Facebook)

  一個肺炎疫情爆到九彩嘅冬日,天氣顯著轉涼,亦無礙扒艇熱情,八個到七個,兩個執雞都唔夠分。七男一女連教練十點前落水,未出發已見白頭浪,教練話出面可能仲會大啲,我回應但願如此。
  有人要簽旅程,行程自然交哂畀佢,今日主題係赤洲,黃石直接來回唔夠數,自然要加啲料,同學仔計劃去埋銀洲。按既定行程,獅地、南風角、棺材角,沿途面對清勁北風,逆風艇速加強風寒效應,一個唔小心,畀啲浪打上身,都幾熬骨,好彩間中有啲陽光,仲頂得住!
  棺材角轉向銀州,唔使頂風頂浪嘞,橫風幫手吹埋海下灣B黃泡,兩個人經磨洲去到銀洲停低等後面,好耐都唔見人到,最後教練快艇埋嚟叫我哋唔使等,佢哋喺磨洲已經轉去赤洲嘞。赤洲旅程,今次係個人扒過嘅最好玩一次,有風有浪,但又可以駕馭得到,可惜咁嘅環境,好難開電話影相,有得有失。
  埋到赤洲,上岸等,好大風,要搵大石避風,見有入滿水嘅艇扒埋嚟,好唔好彩未到就反咗,三隻岸上嘅艇落返水諗住幫手,奈何大風大浪,救艇徒耗體力,唯有拖佢埋岸清艇。冇幾耐,教練陪住另一隻入滿水嘅艇扒埋嚟,呢位做功課嘅艇友好彩,可以自己埋灘,教練可能見佢大大隻又要簽旅程,所以畀個機會佢練習吓。
  艇隻入水事件,主因係防浪裙滲水,平時風平浪靜冇人會發覺,今日就經唔起風浪考驗,加上有人唔覺艇入面有些少水係問題,冇喺小休時及時清走,以致愈入愈多。事後了解,有人用咗私家裙,喺今次事件中完全置身事外。
  搞掂哂回程,風浪細咗好多,食住尾流經孝子角入塔門大休,唔扒曬住都覺凍,又關風事,好彩帶咗件膠衣落艇,可以保吓溫。食完去天后廟影幾張相先落水,高流灣、黃茅角、東心淇返中心已經係例牌,三點七上水,仲要收拾器材,搭四點車好抆,不如慢慢沖涼,喺中心坐多陣,否則又宣佈停開,都唔知幾時再有機會入嚟。

二零二零年十一月三十日。獨木舟旅程
黃石水上活動中心,獅地,南風角,棺材角,海下灣B泡,磨洲,銀洲,赤洲,孝子角,塔門(大休);高流灣,黃茅角,東心淇,黃石水上活動中心。(21.8km)

標準
遊記

龜背土地 狗髀石澳 (201120Facebook)

  莫道君行早,更有早行人,今日赤正高旅,正選身份唔使執雞,慢條斯理九點前到中心以為好早,去完洗手間先報到,竟然係最後一個,八個一早到齊,執雞嘅可以及時引退。
  唔使等執雞,理應好早出發,奈何有隻艇冇咗氣倉個蓋,要搵膠袋封返(中心成日話要注意水上活動安全,但係對器材嘅維護點解咁草率?),搞一輪,耽誤些少,好彩都可以十點前落水。今日風平浪靜,教練唔出快艇扒埋一份,第一站龜背灣。吓!點解唔係出咗去先,返嚟唔夠數再兜內灣㗎?晨早嘥咗啲寶貴光陰,一陣天氣突變返唔到嚟咪死,都唔知乜嘢玩法,不過教練決定,梗有佢嘅理由,只不過我哋啲凡夫俗子參透唔到啫!
  出海前,仲要扒去土地灣,既然如此,梗係埋啲影返幅個人母會(激流會)嘅相先繼續行程。繞過鶴嘴砲台直指狗髀洲,途中有人入咗禁區鶴嘴灣,畀岸上用大聲公嗌走,好彩都冇麻煩。等齊人繼續向石澳進發,去到大頭洲對出海面停低,有人想去埋大浪灣,教練話唔好,係咁就入石澳後灘大休。
  食完嘢有時間,行過藍橋睇吓工程進度,工地圍封咗唔入得,不過梗有自己方法嘅,工程比以前條橋大咗好好多,第日可能成為一個更有規模嘅景點。八完返過後灘,見有滑翔風箏降落,影返幾張相先上艇。
  一點落水,扒過藍橋用另一個角度睇睇單工程先走,去到鶴嘴,冇乜風浪,扒埋雷音洞口影相,不過唔敢入去,驚死!狗髀洲外等齊,下一站去邊?衆議紛紜,教練一錘定音話去隻鑊(大潭頭),收咗指示就走,扒扒吓見唔對路,點解個個都唔係去大潭頭,反而好似返中心咁嘅?
  同大隊距離愈嚟愈遠,唔係嘞,扒返近啲大隊先,去到鶴嘴瀑布對開海面,見佢哋都冇向大潭頭扒嘅意圖,唔理得咁多,自己扒過去啦,可惜冇人一齊,去到大半(距離大潭頭不足一公里),兜過隻貨櫃船算嘞,費事要人搵啦,最後會合埋大隊,齊齊返中心,又係愉快嘅一日!

https://www.facebook.com/media/set/?set=a.10224202610789050&type=3

二零二零年十一月二十日。獨木舟旅程
赤柱正灘水上活動中心,龜背灣,土地灣,鶴嘴砲台,狗髀洲,大頭洲,石澳後灘。(11.9km)
石澳後灘(大休),大頭洲藍橋,石澳後灘。(1.79km)
石澳後灘,大頭洲藍橋,大頭洲,鶴嘴雷音洞,狗髀洲,大潭灣,赤柱正灘水上活動中心。(10.43km)

標準
遊記

大蛇蠄蟧 雞洲大頭 (201116Facebook)

   今日東丫旅程,未落水先刺激,八個位一個提早放棄話唔嚟,康民放返出嚟畀人當日八點半公開後補,但係入創興部車又係開八點半,即係話爭公開後補同執雞都要上車,四個正選三個後補一齊入創興,牌面有位剩,行車途中,公開後補位畀人執咗,入到中心,剩低兩個執雞嘅排隊等九點半,三個位兩個執都好穩陣,點知有人搭的士及時趕到,一額汗,好彩最後再冇人到,皆大歡喜!
  五男三女連教練,一行九人十點出發,天色晴朗,企人石、大蛇灣、蠄蟧灣、蛇灣角,例牌路線沙橋大休。下晝行遠些少,扒過馬頭環,環埋南風洲先返轉頭,有人話想入糧船灣啲魚排行吓,教練冇托手踭 ,跟住就原路回程,去到企人石,教練見時間仲早,建議兜埋大頭洲先返中心,冇人反對之下,咁又可以扒多兩崎。

二零二零年十一月十六日。獨木舟旅程
創興水上活動中心,企人石燈標(183),大蛇灣,蠄蟧灣,蛇灣角,沙橋(大休) ; 馬頭環,南風洲,沙橋頭公眾碼頭(S4),糧船灣碼頭(S10),蛇灣角,蠄蟧灣,大蛇灣,企人石燈標(183),雞洲,大頭洲,大頭洲公眾碼頭(S12),創興水上活動中心。(19.8km)

https://my.viewranger.com/track/details/MTcwMjc4Mjk=
標準
遊記

環鴨脷洲 登玉桂山 (201106Facebook)

   無視艾莎尼在港境外圍蠢蠢欲動,按計劃到聖士提反灣執雞,有人事先張揚唔到,未交錢先攞定艇,唔使臨急臨忙咁踢腳。
  六男一女連教練八人,未夠十點落水,路線向西,銀洲(86)、鴨脷嘴(198)稍歇,跟住龍山排(195)、火藥洲(101)兜返轉頭,避風塘口等齊人。扒艇遊避風塘,真係冇幾何,颱風關係,勁多漁船,偶遇舢舨旅遊艇隻穿梭。過咗橋底,喺珍寶海鮮坊背後睇吓華麗嘅另一面。過黃泥排(199)、南避風塘東堤(130)、西堤(129)後,鴨脷排連島沙堤大休。
  食完午餐利用剩低嘅時間上玉桂山行返轉,山頂(196M)比幾年前多咗舊嘢,縷述二次世界大戰本港淪陷後,一批中、英官兵嘅逃亡經歷,時間緊逼,梗係影低返屋企先睇啦。條路真係好爛,滿途碎石,塵土飛揚,一仆一轆落山,艇友已經落哂水,馬不停蹄又扒過,熨波洲、頭洲到舂坎角,沿途不停站,都係兩點鬆啲,轉入內灣各適其適,扒入卜公碼頭穿過橋底返中心,又盡一日之遊。

二零二零年十一月六日。 獨木舟旅程
聖士提反灣水上活動中心,舂坎角,銀洲,鴨脷嘴,龍山排,火藥洲,香港仔西避風塘,香港仔南避風塘,鴨脷排沙堤(大休),玉桂山頂,鴨脷排沙堤,深水角,熨波洲,頭洲,舂坎角,卜公碼頭,聖士提反灣水上活動中心。(23.9km) 

標準