遊記景物介紹

南風赤洲 塔門高流 (181015Facebook)

  扒獨木舟去赤洲,呢兩年都去過好多次,但係始終見唔到地圖上標喺大環嗰間廟,有人話入林搵過都摷唔到。
  山竹過後,十月一號黃石高旅去赤洲,扒經大環嗰陣,好清楚見有小型建築物喺灘後當眼位置,由於當時驚畀人賣甩,所以冇上岸 ; 今次唔係嘞,專程扒去兼上埋岸,影返啲相做個紀錄。
  間廟全用水泥塑造,冇木質構件,冇顯示任何文字,冇神像(得舊石),但有新近拜祭痕跡及拜祭用品,有些少舊硬幣散佈拜桌上,有頗多孵化後嘅動物蛋殼(有識者見過話係檐蛇蛋)黐喺屋頂。個人估計係間廟淹埋喺高過人頭嘅草叢或冧泥入面,所以難於發現,一場大風將沙石雜草清除,小廟先可以重見天日,亦吸引路過艇隻重來拜祭。

二零一八年十月十五日。獨木舟旅程
黃石水上活動中心,獅地,南風角,棺材角,赤洲大環,流水坑氹,羊角頭,孝子角,塔門下圍大休。(15.3km)
下圍,瓊林學校,下圍。(0.64km)
塔門,高流灣,東心淇,黃石水上活動中心。(5.72km)

標準
遊記避疫嶼山景物介紹

廟墩南崖 (201012Facebook)

一號風球,取態優悠,唔行咁遠,不假外求,
嶼山勝景,包羅萬有,如何取捨,𢯎爆個頭。
廟仔墩頂,近在左右,目標鎖定,稍作綢繆,
屋企起步,行去就夠,車都唔搭,減排一流。
愉景豪宅,用地廣袤,掠奪山徑,早有圖謀,
昔日標柱,得如唾手,如今攀石,始可一遊。
登紅水山,轉身回眸,犁地翻土,為打高球,
頂上舊標,化為烏有,填封石屎,即係榮休。
續走梅窩,經過涌口,袁氏大屋,仲有更樓,
南山古道,緩緩上走,大牛湖頂,不作久留。
貝澳天后,歷史悠久,翻新除舊,正值維修,
美侖美奐,需要時候,照常開放,未見人流。
廟墩南崖,崢嶸峻秀,心儀好耐,從未訪遊,
戰戰兢兢,空拳赤手,孤身獨探,險過剃頭。
身陷草莽,頭大如斗,石河之上,稍歇回頭,
望東灣後,有石鼓洲,煙波浩淼,解慮消愁。
石崖之上,有爬山扣,攀登勝地,咪話佢流,
附壁而行,不能顫抖,接回山徑,變返郊遊。
落到貝澳,涉渡河口,沙灘之上,見有水牛,
聯群浴日,不相爭鬥,至高境界,無欲無求。
行程至此,已到最後,驀然回首,細味從頭,
箇中經歷,有如醇酒,半癡半醉,心中永留。

https://www.facebook.com/LiWaiOn/media_set?set=a.10223872374213342&type=3

二零二零年十月十二日
愉景灣,紅水山,銀礦灣泳灘,梅窩洪聖古廟,袁氏大屋,鹿地塘,南山,大牛湖頂,十塱坳,貝澳天后宮,廟墩南崖,廟仔墩頂,十塱坳,貝澳天后宮,貝澳泳灘,嶼南道。(20.2km)

https://my.viewranger.com/track/details/MTY1NjkyNDE=
標準
遊記景物介紹

雨後嶼山–毅行計劃之九 (090111健行之友網頁)

  二零零八年七月廿七日,健行之友活動於雨災後再訪大嶼山,距離事發當日五十天,天氣起了很大變化,未到起步時間,已是豔陽高照,卻無阻眾行友的熱情。由於是次行程乃於雨後策畫,故有刻意走訪「災區」之嫌。
  東涌附近溪流,並沒有出現預期中的驚嚇場面,可能是「希望逾大,失望逾大」及未能深入澗道的關係;反而當局於事發後的修補及防護工程,令大家明白到防患未然的重要性。
  接近白芒,東梅古道旁一草坡被取名為「奧運林」,觀察四週雖未見樹影,但假以時日,有誰敢保證不會變成樹林,說明當局頗具「遠見」。
  走過被熱炒為「奧運徑」的一段東梅古道,仍然是那舊模樣,只是添加了一些與奧運有關的配套設施,總算扯得上關係,至於如何利用此路徑去提高市民的運動意識,當然欠奉。
  由於個人速度所限,略過設定給快速行友途經白富田的一段鳳凰徑,由梅窩取古道直上南山,全走南大嶼郊遊徑至水口,伯公坳前的郊遊徑「災情」較為嚴重,但大部分已修復,只有青龍石澗之後的一個谷位,水土流失程度實在太大,非朝夕之間可以復原。伯公坳後,大致上已算步入坦途,零星的破壞只能以等閑視之,下達引水道,直趨水口大休。
  酷熱天氣影響行程,大部分參加者均超時抵步,在士多補充後,分批再踏上下午途程,幸而天色突轉昏暗,狂風大作,對暑氣有紓緩作用。踏入石壁郊遊徑,眼見天將欲雨,只好心無旁騖,加快腳步,皆因瀉坡處處,杯弓蛇影乃自然反應。
  狗牙坑漸近,心情有點緊張,抵步之後,果然眼界大開,行山接近半個世紀也未曾得見的「偉大」場面頓現眼前,縱有生花妙筆,也難形容其萬一,非親歷其境,焉能感受其震攝氣勢。礙於時間緊逼,未便久留,匆匆踏上歸途,取道心經簡林,再接法門古道下東涌,結束是日行程。

「雨後大嶼山」圖輯

標準
遊記景物介紹

雨後嶼山–鳳凰造極 (080715健行之友網頁)

  二零零八年六月七日,一場罕見的暴雨,癱瘓了大嶼山西北部,由於泥濘阻道,汽車不能經東涌進入機場島;大澳居民更因山泥傾瀉,飽受食水、電話、陸路交通中斷之苦,為日常生活帶來極度不便。
  嶼山遠足,向被視為遠離煩囂的選擇,在是次暴雨之後,部分清幽山徑被破壞至體無完膚,山體上泥土嚴重流失,遺下明顯的沖刷痕跡,要回復昔日舊觀,相信必須假以時日。郊野公園管理局在多條主要行山徑入口豎立告示牌,勸籲遊人避免使用。
  大雨過後兩星期,健行之友活動適逢大嶼山線,參加者在旅途中,得以一窺大自然的威力,亦可為日後行程,遇到極度惡劣天氣時的取捨,重新定下一套更有效的應變準則。
  乘巴士將抵東涌消防局,見婆髻山與薄刀屻上一條條裸露乾坑,已知是泥淹東涌的元兇。起步不久,遠望彌勒山,吊車仍在維修,未能接載遊人,卻見一度瀉坡,由接近山頂處直透山腳,彌勒山郊遊徑(彌勒金腰)的境況,可想而知。進入東涌道旁早前改善工程下新修的混凝土小徑,自東涌道沖下的亂石不絕於途,部分低窪地帶積水仍未消退。
  取道石門甲道入溯鳳大北坑,澗口附近植物仍默默地順著當日山洪的走勢繼續生長,反觀橋面倒下的鐵欄卻寧死不「屈」,縱使被流水連「根」拔起,仍筆直地躺下,這當然要拜在施工時未有將鐵欄底部深藏地上所賜,風趣的行友稱之為豆腐渣工程香港版。
  澗道之內,水清石潔,儼如一條素未謀面的溪流。沿途無大困阻,只是水流略豐,隨處可見當日洪水摧枯拉朽的力量,偶爾見澗旁東涌道瀕臨崩塌的路基,岌岌可危。
  鳳東飛流右折地塘仔郊遊徑出伯公坳,新公路的工程進行得如火如荼,接鳳凰徑登鳳凰山,在左下塘福的路口,首見郊野公園管理局在鳳凰徑上豎立告示牌,勸籲遊人原路折返。事實上,就當日所見,自伯公坳起越鳳峰至鳳凰坳一段路面,並無發現有何變化,極其量就是南天門附近的瀉坡,但卻離鳳徑本身有一段距離,未致不能踏足的地步。

  過閻王壁、一線生機、轉入東狗牙,沿途發現兩旁有或大或小的崩塌,但對行進並未構成障礙,其中以狗牙坑情況最為嚴重,舊日(乾)坑內黝黑色碎石已蕩然無存,只餘下一條裸露的泥溝。有部分參加者取道中狗牙經石壁郊遊徑(貝納祺徑)下引水道,路面情況亦與往常無大分別。
  按原定計劃於水口大休,鑑於下午路線以山腰步徑為主,已預計行程必受延誤,當日雖為全年日照最長的星期日(夏至翌日),亦不得不重新部署,乃以分組形式,走訪羗山郊遊徑與鳳凰徑第四段。上述兩線,為全日行程的重災區,大部分跨過溪流的步徑都被沖塌,牽涉範圍非常廣泛,個別更形成斷崖,遊者需附壁而行,甚或下走深深的陷坑,再攀接一谷之隔的步徑,始可繼續行程,倘非親臨斯地,實不能感受其震撼力。
  九三年間梧桐寨發生的山泥傾瀉,將長瀑底與長瀑頂之間的步徑沖塌,令到一條可以串遊區內瀑布群的要道一分為二;事隔多年,至今仍未被有關當局稍加修葺,重新開放給市民使用,以當年塌泥規模,與今次大嶼山島上的災情比較,實有小巫見大巫之感。本港現時仍值雨季,維修工程預料難於短期內開展,復通更是遙遙無期,但這卻留下相當充裕時間,給好求新取異者逐一探遊的機會。

「雨後大嶼山」圖輯

標準
評論景物介紹

香港奧運徑 (080801Facebook網誌)

  位於大嶼山東部的奧運徑,西北起三鄉(白芒、牛牯塱、大蠔三村的統稱)白芒,東南迄梅窩白銀鄉,全長五點一六公里,昔為東梅古道部分,二零零八年藉北京舉辦奧運,乃將熱炒概念注入,實行借殼上市。京奧聖火在港傳送期間,並無途經該地,奧運徑之稱號,徒具虛名而已。
  奧運徑上,豎有多枝無編號但附距離的標距柱,標示立柱點與白芒及白銀鄉兩者的距離,按照柱上數字伸算,全徑共長五點一六公里,但七月十八日官方新聞公報與曾特首揭幕致辭均為五點六公里。至於起迄點明確位置,沒有在白芒、白銀鄉兩村留下任何標記,可能就是避免長度上的爭拗。為方便特首到達,揭幕禮特設在白芒村外翔東路旁,當日的道具—-揭幕紀念牌匾現已不知所終,就連往奧運徑方向的指示牌也欠奉,頗為低調,難道要防止恐佈襲擊。
  奧運徑沿途,路面嵌有多塊刻上奧運比賽項目圖案的混凝土,包括馬術、乒乓球、賽艇、射擊、鐵人三項、擊劍、游泳、羽毛球、田徑、自行車、帆船等,乃在原來舊村徑上的新建物體。
  自白芒起步,經白望學校、牛牯塱村、大蠔村上走,途中建有中式觀景方亭一所,紅柱綠瓦,雖屬舊築,亦頗為奪目,佇立亭前,環視蓮花、婆髻、青山、老虎頭群山靜伏,大蠔灣外青嶼幹線與鐵路上車輛疾馳。跨過全徑最高點(海拔二百二十七米),下走望渡坳避雨亭,可近賞蓮花山壯麗景色,也可遠眺梅窩的悠閒寧謐。
  沿混凝土階下走,途經與銀礦灣齊名的梅窩勝景–因安全理由被封閉的銀礦洞,以及前方築有小型公園供人休憩的銀礦瀑;至此,再前行不遠,便抵終點白銀鄉,順遊文武廟後,按指示遊人由梅窩進入奧運徑的指示牌逆走,可步往梅窩碼頭。
  香港奧運徑的選址,雖云缺乏說服力,但處事者亦經過深思孰慮,只要明白其刻意將終點設定為白銀鄉,已知是神來之筆,寓意本港健兒最終目的都只為取得銀牌,並無意在金牌上與祖國健兒互爭雄長,喧賓奪主;再者,官方新聞公報將全徑長度五點一六公里的「一」字略去,表明第一於我似浮雲,實防功高蓋主。「金牌」與「第一」,奧運的最高榮譽,還是留給祖國健兒獨領風騷罷,未知這是否奧運徑智囊團的真正意願。


標準
景物介紹

久違了的鶴嘴 (150905Facebook網誌)

  港島東部嘅龍脊,向南經打爛埕頂、鶴嘴山一脈延伸,盡頭入海成一岬角,洋名跟中環嗰條德己立街(D’Aguilar Street,以前叫德忌笠街)同埋頭先講嗰個鶴嘴山(D’Aguilar Peak)相同,中文名就叫做鶴嘴,雖然官方地圖同漁護署都採用「鶴咀」,我自己就主張用鶴嘴呢個寫法,主要係嘴、咀兩個字有唔同嘅用法,唔存在正體簡體問題。 仲著住救生衣,話唔係扒艇去都冇人信。(1995)仲著住救生衣,話唔係扒艇去都冇人信。(1995)
  上世紀八、九十年代個人玩埋獨木舟嗰陣,去鶴嘴基本上係冇乜難度,艇會喺土地灣,係港九新界計埋離島在內,最近鶴嘴嘅獨木舟會,去石澳、大廟、東龍、蒲台嘅旅程,鶴嘴灣就係用嚟觀測外面風浪嘅橋頭堡,得閑仲可以上埋狗髀洲用高啲角度望返成個鶴嘴嘅景色。當年由添馬艦扒去淺水灣嘅半環島馬拉松比賽,鶴嘴灣係檢查站之一,亦係畀捱完鯉魚門至狗髀洲啲風浪嘅運動員一個歇息地方。 狗髀洲回望整個鶴嘴區嘅景色(1995)狗髀洲回望整個鶴嘴區嘅景色(1995)
  自從鶴嘴海岸保護區設立(1996),劃定嘅水域禁止任何水上活動,呢枝歌仔就變咗冇得唱。個人活動回歸岸上之後,都試過喺鶴嘴道行落去,當時冇閘冇盛,但係有路牌寫明係禁區,更亭又有警衛把守,咁梗係唔會硬闖啦,事後亦冇咁多時間去查核進入呢個地區嘅合法性,由嗰時開始,就好似唔記得咗有呢個地方。
  時間過得好快,斬吓眼就過咗廿年,忽然間喺臉書見好多朋友聯群結隊,好似去鶴嘴趁墟咁,咪引發起舊地重遊意念,最後仲開埋條線齊齊開心,反正一條車路行落去,連路都唔使試,何樂而不為?桃花依舊,人面全非,以前一齊去嘅係艇友,依家就換咗做山友。雷音洞、蟹洞、鯨魚骨、古燈塔,景物依然,不過路途上就多咗好多指示牌,明顯係為咗遊人而設。 放喺戶外嘅殺人鯨骨骼標本(1991)放喺戶外嘅殺人鯨骨骼標本(1991)
  今次想講嘅係條鯨魚骨骼標本,當年第一眼見佢,就覺得喺度日曬雨淋,都唔慌會長命,呢度係講條魚骨而唔係講條鯨魚,點知闊別多年,仲風采依然,絲毫無損,唔知係保養得好定係換過第二條。點解咁講呢,因為睇返資料,先知道呢條鯨魚就係海洋公園以前嘅殺人鯨「海威」(https://zh.wikipedia.org/wiki/%E6%B5%B7%E5%A8%81),佢辛勞一世,九七年鞠躬盡瘁,但係死咗都唔可以入土為安,仲要曝屍荒野。摷返啲舊相出嚟睇吓,九一年已經有另一條喺度,嗰陣「海威」仲未死,證明係另有其鯨,到底「海威」死之前嗰條,係咪維基百科入面提到嘅另一條殺人鯨「皇子」呢,咁就要再查吓先知嘞。

標準
遊記景物介紹

冰封鳳凰山 (160125Facebook網誌)

  冰封鳳凰山,有冇人見過,我見過,我真係見過!

  我有上山嘅自由,冇人可以唔畀我上去!

  當人人喺大帽山玩緊真雪溜冰嗰陣,我揀咗去鳳凰山燒冷灶,一來避開人群,二來偶一失手都唔會笑到人碌地。一如所料,伯公坳冇人剝奪市民嘅自由,要上去死,唔阻你,爭在冇人送你一程啫!

  起步初時都冇乜點,過哂啲樹林同埋水氹,同平時細雨行山冇乜分別,亦唔覺特別跣。上大石級先係戲肉,風大到幾乎企唔穩,草同樹都包哂冰唔在講,部份石面都結咗層薄冰,心諗今次冇死嘞啩,山頂仲唔封到陷哂?

  由於冇預到石級會結冰,即時企咗喺度,石面結咗冰梗係好跣,咁揀兩邊泥路啦,沙泥夾雜大風打落嚟嘅冰碎,咪一樣咁跣!試一小段,上咗去返落嚟,計吓時,加埋愈高愈惡劣嘅因素,咪天黑都落唔到山?

  算把啦!鬼叫你自己學藝不精,雖然下次冰封鳳凰未必有咁長命睇得到,總好過今日鳳凰山有單新聞聽日自己睇唔到吖!係咁,就將自己喺風雨中抱緊嘅自由放棄咗嘞,不過就冇浪費到啲救援資源。

  冰封鳳凰山,我見過,我真係見過。見過又點啫,你上得到頂咩?

樹都包哂冰

標準
評論景物介紹

一碉還有一碉高 (160218Facebook網誌)

  「沙頭角伯公坳麥景陶碉堡是七座麥景陶碉堡中位處最北方和海拔第二高的一座」、「沙頭角礦山麥景陶碉堡位於蓮麻坑村附近,是邊境七座麥景陶碉堡中海拔最高的一座」。上面嗰兩段嘢,分別係伯公坳同礦山兩座麥景陶碉堡說明牌上嘅介紹文字,內容有關佢哋嘅一般性資料,如果影低擺埋,不加理會,日後攞返出嚟用,仲話有圖有真相,嗰陣真係笑到趴喺度!  

伯公坳麥景陶碉堡說明牌

查邊境七座麥景陶碉堡之中,講最東,你伯公坳認咗第二真係冇其他麥堡敢認第一,至於被話係最北,咁就直情當白虎山嗰座冇到啫,最盞嘅就係白虎山嗰便個說明牌又冇話自己係最北,配合得天衣無縫。位置呢樣嘢,我識條鐵咩,不過攤開張地圖就一目了然,唔知點解會犯呢啲咁低級嘅錯誤?唔通真係求其噏,當祕笈!

政府地圖顯示兩者在高度上嘅差別

  一不離二,順眼睇埋海拔高度,冇帶高度計行山,到過都測唔到,惟有參考啲地圖等高線啦:政府地圖(礦山210-220,伯公坳>280)、google map(礦山<200,伯公坳240-260)、中原地圖(礦山200-220,伯公坳280-300),三個都係伯公坳高過礦山,唔知為乜要定性礦山係最高?  
網上傳言,有謂不可盡信,實體資料,又好得去邊度?有啲嘢,話得事嘅想點寫就點寫,好似頒獎禮咁,你想點頒就點頒,冇人奈得你何,但係關乎實質數據嘅,就唔可以混淆黑白,顛倒是非,至於今次係個別事件,定係不誠實使用資訊呢?箇中柢蘊,真係耐人尋味!

三座麥景陶碉堡嘅位置:白虎山(左)、礦山(中)、伯公坳(右)。

標準
景物介紹

香港北極 —白虎山 (160302Facebook網誌)

香港境內最北一枝標

  邊境禁區,昔日可望不可即,就算你幾想入去行吓,禁區紙亦唔會為旅遊而簽發,總係難越雷池半步,如今解禁,大眾可以長驅直入,一解多年以來單思之苦!
  打鼓嶺與蓮麻坑之間,有山名白虎,同西貢糧船灣洲嗰座同名異地,高度一百米有找,得九十八,論資排輩,照理應該唔入流,但係山不在高,只要位置優勝,就成為境內行山人士多年以來趨之若鶩嘅最北一座山峰,順理成章,山頂枝標高柱亦成為境內最北一枝標。
  白虎山個名嘅來歷,唔識稽考,似白老虎?同玄學入面青龍白虎有關?伯父嘅諧音?唐寅(伯虎)嚟過?google 都 google 唔到,無謂諗嘞,等有識之士作啦!
  山頂部份,有警務處嘅麥景陶碉堡、水務署嘅定壓池,都用白虎山命名,但喺山腰警方有行動基地則取名白花山,個人認為虎、花兩個字嘅英文音譯 Fu、Fa 字形相近, 手民之誤所致。有行友則認為白虎殺氣大,用白花可以化解殺氣。更有意見認為改名嗰個有遠見,預期回歸後警徽上面嗰朶白花。下山途中,你一言我一語之際,見路旁有大量白花盛放,似有另一番解讀。

標準
遊記避疫嶼山景物介紹

疫下嶼西 (200720Facebook)

  趁禁足令未發,去分流行返轉,貪佢人少,可惜帶唔到咁多水,中途又冇補給,仲要撞啱大退,行埋過雞翼角,用多咗半粒鐘,終於要喺大澳切碎!
  沿途所見,四大營地入口已張貼告示,表示因疫情封閉,不准市民進入,好彩山徑仲係通行無阻,未受影響,但限聚令下,群組人數仍受掣肘,以免病毒擴散!

https://www.facebook.com/LiWaiOn/media_set?set=a.10223104640740485&type=3

二零二零年七月二十日。
石壁水塘,石壁碼頭,石壁石刻,嶼南界碑,狗嶺涌,分流東灣,槳腳石,分流砲台,分流燈塔,分流天后廟,煎魚灣,雞翼角,普濟禪寺遺蹟,二澳,大澳。(24.2km)

https://my.viewranger.com/track/details/MTUyNTEwNDE=
標準