遊記避疫嶼山景物介紹

廟墩南崖 (201012Facebook)

一號風球,取態優悠,唔行咁遠,不假外求,
嶼山勝景,包羅萬有,如何取捨,𢯎爆個頭。
廟仔墩頂,近在左右,目標鎖定,稍作綢繆,
屋企起步,行去就夠,車都唔搭,減排一流。
愉景豪宅,用地廣袤,掠奪山徑,早有圖謀,
昔日標柱,得如唾手,如今攀石,始可一遊。
登紅水山,轉身回眸,犁地翻土,為打高球,
頂上舊標,化為烏有,填封石屎,即係榮休。
續走梅窩,經過涌口,袁氏大屋,仲有更樓,
南山古道,緩緩上走,大牛湖頂,不作久留。
貝澳天后,歷史悠久,翻新除舊,正值維修,
美侖美奐,需要時候,照常開放,未見人流。
廟墩南崖,崢嶸峻秀,心儀好耐,從未訪遊,
戰戰兢兢,空拳赤手,孤身獨探,險過剃頭。
身陷草莽,頭大如斗,石河之上,稍歇回頭,
望東灣後,有石鼓洲,煙波浩淼,解慮消愁。
石崖之上,有爬山扣,攀登勝地,咪話佢流,
附壁而行,不能顫抖,接回山徑,變返郊遊。
落到貝澳,涉渡河口,沙灘之上,見有水牛,
聯群浴日,不相爭鬥,至高境界,無欲無求。
行程至此,已到最後,驀然回首,細味從頭,
箇中經歷,有如醇酒,半癡半醉,心中永留。

https://www.facebook.com/LiWaiOn/media_set?set=a.10223872374213342&type=3

二零二零年十月十二日
愉景灣,紅水山,銀礦灣泳灘,梅窩洪聖古廟,袁氏大屋,鹿地塘,南山,大牛湖頂,十塱坳,貝澳天后宮,廟墩南崖,廟仔墩頂,十塱坳,貝澳天后宮,貝澳泳灘,嶼南道。(20.2km)

https://my.viewranger.com/track/details/MTY1NjkyNDE=
標準
遊記避疫嶼山景物介紹

疫下嶼西 (200720Facebook)

  趁禁足令未發,去分流行返轉,貪佢人少,可惜帶唔到咁多水,中途又冇補給,仲要撞啱大退,行埋過雞翼角,用多咗半粒鐘,終於要喺大澳切碎!
  沿途所見,四大營地入口已張貼告示,表示因疫情封閉,不准市民進入,好彩山徑仲係通行無阻,未受影響,但限聚令下,群組人數仍受掣肘,以免病毒擴散!

https://www.facebook.com/LiWaiOn/media_set?set=a.10223104640740485&type=3

二零二零年七月二十日。
石壁水塘,石壁碼頭,石壁石刻,嶼南界碑,狗嶺涌,分流東灣,槳腳石,分流砲台,分流燈塔,分流天后廟,煎魚灣,雞翼角,普濟禪寺遺蹟,二澳,大澳。(24.2km)

https://my.viewranger.com/track/details/MTUyNTEwNDE=
標準
遊記避疫嶼山景物介紹

九碼連遊 (200727Facebook)

  神機妙算,預知行程會有阻滯,提早出門口,美其名睇日出,點知烏雲密佈,疊埋心水行山好過啦。平時過梅窩條路,到頂改落萬角嘴,途中發現一朶十五瓣毛菍花,花瓣數量比起常見嘅六、七瓣多出一倍有多。
  未夠九點到銀礦灣,救生員都未開工,梅窩早餐後超巿買枝水繼續行程,沿住海邊到拾塱,買罐汽水降吓溫。芝麻灣之後,龍尾落大浪灣,個碼頭中段畀風打冧咗,臨時搵鐵架頂住先,喺灘邊浸完鹹水先去灘尾過二浪,以前跟住啲仙人掌行就冇錯,今次過咗兩顆已經好難再見有路,拖鞋打林又蝕章,唯有行返上龍尾,九曲十三彎落二浪,阿Q精神話可以呃崎數。
  澄碧邨個碼頭工程進行中,區內有幾個單位裝修緊,唔知同山竹有冇關係,上返郊遊徑去埋最後一個碼頭,名叫望東灣,其實係向西。喺沙灘浸完鹹水直出貝澳,涉水過泳灘唔入村,出嶼南道搭車返東涌,仲趕得切下午茶。

https://www.facebook.com/LiWaiOn/media_set?set=a.10223174133237754&type=3

二零二零年七月廿七日。
愉景灣,愉景灣碼頭,稔樹灣碼頭,神樂院碼頭,萬角嘴碼頭,銀礦灣,梅窩碼頭,水井灣,橫塘,拾塱,芝麻灣碼頭,十塱水塘,龍尾,大浪灣碼頭,龍尾,澄碧邨碼頭,望東灣碼頭,貝澳。(36.02km)

https://my.viewranger.com/track/details/MTUzNzQ5NjI=
標準
遊記避疫嶼山景物介紹

三山七碼 (200803Facebook)

  起步前天文台已發定點降雨預報,按原定計劃上山,戴住口罩唔係郊遊,呼吸有啲困難,戴定唔戴,唞得到氣先好戴,點決定?自己執生!過咗老虎頭,離開郊遊徑過田寮頂,滂沱大雨,烏雲瀰漫,兩峰過後,見到枝標先稍減。田寮頂落山,睇落好簡單,不過避林踩草,都幾嘥時間,山頂枝標落到灣篤條橋,短短一崎,用咗個半鐘,學藝不精,咪賴地硬!
  時間唔早,放棄婆髻山,直接經海皮去東涌早餐,食完又落雨,為保口罩,擔遮繼續行,小砲台、馬灣涌、䃟頭沙螺灣,人影唔多個,好快䃟石灣,過埋深屈寶珠潭上到虎山,陽光乍現,但係睇日落為時未晚,落山行出石仔埗碼頭,回走關帝廟、天后廟,先去大澳巴士站,時間唔早,腳步也蹣跚。

https://www.facebook.com/LiWaiOn/media_set?set=a.10223247789879124&type=3

二零二零年八月三日。
愉景灣,老虎頭,老虎頭郊遊徑,田寮頂,大蠔,牛牯塱,白芒,東涌,馬灣涌碼頭,䃟頭碼頭,沙螺灣渡輪碼頭,沙螺灣碼頭,沙螺灣觀景台,䃟石灣碼頭,深屈碼頭,嶼北界碑,大澳新基,寶珠潭,虎山,大澳石仔埗碼頭,大澳巴士總站。(34.8km)

https://my.viewranger.com/track/details/MTU0OTA4MDk=
標準
遊記避疫嶼山景物介紹

嶼東山嶺 (200810Facebook)

  大嶼山東北,自二白坳起,崗陵起伏,高度衹三百,計畫由屋企起步,中午去到迪欣湖補給,豈料事與願違。過咗大輋峒,路上嘅草開始變長,犁壁山頂枝標,冇以前咁易上,去到林邊都要褪返轉頭。大山早餐後過大陰頂,條「新」路開到好闊,不過上到頂又變返密,花瓶頂落花坪,全日最暢順,去完草灣碼頭回頭喺花坪灣浸水降溫。穿過冇上鎖閘門,向迪士尼進發,自此踏進密林行程,高過人嘅灌木,地上藤蔓交纒,舉步維艱,有段路竟然睇住地圖都搵唔到,唯有上高啲再落返嚟。超出預算,又要控制飲水量,好唔容易見到竹篙灣隔離營,仲有幾個山頭先到竹篙灣嘴枝標,跟住水渠位落山就係迪士尼站,迪欣湖唔去嘞,玩咗成日,搭車走好過。

https://www.facebook.com/LiWaiOn/media_set?set=a.10223315983983934&type=3

二零二零年八月十日。
愉景灣,二白坳,大輋峒,犁壁山,大山,大陰頂,花瓶頂,花瓶石,草灣,花坪,扒頭鼓,竹篙灣嘴,迪士尼站。(16.14km)

https://my.viewranger.com/track/details/MTU2MTAxNTE=

標準
遊記避疫嶼山景物介紹

虎頭鹿頸 (200817Facebook)

  行路出欣澳,唔使咁早,屋企食埋早餐,仲要兜路,目標係長索小島,下晝四點退盡,計畫兩點零鐘到,一點半去到打棚埔,見時間仲早,上山仔 Kill 埋枝標,去到鹿頸兩點半,時間啱啱好!
  連島碎石堤,水退乾到似條路,逆時針綑,着拖鞋都冇乜難度,好快到長索嘴,有枝巨型燈標係107號,回程綑過鹿頸灣,避免咁多回頭路,灘後有燒烤爐,不過公廁冇水喉洗手,燒完唔知點算好,出返陰澳篤,沿海堤就去到欣澳,六個鐘行程,十零崎,好過冇!

https://www.facebook.com/LiWaiOn/media_set?set=a.10223376114007147&type=3

二零二零年八月十七日
愉景灣,228,意峰,愉景灣水塘,老虎頭郊遊徑,和尚峒,老虎頭,榴花峒,大輋峒,北大嶼山微波連接系統站,翔東路,打棚埔,陰澳篤,鹿頸村,鹿頸碼頭,長索嘴,鹿頸灣,陰澳篤,欣澳站。(16.5km)

https://my.viewranger.com/track/details/MTU3MjU2MjY=
標準
遊記避疫嶼山景物介紹

嶼山四秀 (200824Facebook)

早睡早起身體好,睇埋日出去搭渡,
舟舟勞頓到梅窩,食埋早餐八點度,
買啲飲料先起步,上南山行嶼南道,
加遊虎崗在中途,冇特別爲到而到。
鳳凰徑上雙東坳,初秋時份天氣好,
草色微黃帶餘青,蓮花山頂靠右路,
天帝之床方向落,回走雙東坳仲早,
有衝動上埋二東,不過冇標就算數。
幻紫斑蝶佈滿途,群起紛飛齊狂舞,
捨鳳徑上大東頂,落嚟竟然有大路,
鳳徑石級執返好,中途起個觀景台,
加兩張櫈用木做,伯公坳好快就到。

  食完上鳳凰,雖然好耐冇嚟過,不過都唔覺有乜變化,半山睇人玩滑翔傘當小休,唔知上咗幾耐,終於見到山頂間屋仔,弱弩之末,對腳叫自己唔好急,慢慢捱到山頂,有人維修緊枝標,行咁耐山第一次見。頂上遇山友,好彩唔係債主,吹一輪水後分道揚鑣,過斬柴坳天梯落昂坪,中途要停低等大腿肌肉放鬆,先知乜嘢叫做上山容易落山難,期間順手清哂背囊入面食得嘅嘢。
  落到昂坪,第一時間去七仔,冇開,唯有幫襯鋪仔,飲咗啲凍嘢見仲早,況且蓮花、大東、鳳凰都上咗,冇理由唔上埋彌勒㗎。賈其餘勇,再上征途,銅鼓響石係必經,仲記得位置證明未老人癡呆,接入東山法門上山條路,已知好快到頂,不過點快都唔夠啲霧咁快。落山條路大咗好多,證明好耐冇行過,跨過彌勒金腰過吊車轉向站,一條大路返東涌,又盡一日之遊。

https://www.facebook.com/LiWaiOn/media_set?set=a.10223446986418913&type=3

二零二零年八月廿四日
梅窩,虎崗,南山,雙東坳,蓮花山(766米),雙東坳,大東山(869米),伯公坳,鳳凰山(934米),昂坪,彌勒山(751米),吊車轉向站,昂坪360救援徑,東涌。(26.0km)

https://my.viewranger.com/track/details/MTU4NDY4MzE=
標準
遊記避疫嶼山景物介紹

嶼西山嶺 (200831Facebook)

天陰陰,昏暗暗,搵山行,舒悶困,
狗牙嶺,冇乜人,粗粗哋,頂吓癮,
一枝弓,唔使問,似孤雁,未能群,
警告牌,為路引,漁護署,有心人。
山峰高,如萬仞,臨崖頂,心驚震,
想借力,冇帶棍,影影相,定吓神,
手不靈,腳不敏,踢拖鞋,倍小心,
慢慢行,穩穩陣,如俯伏,似蟻行。
閻王壁,斜到暈,差啲多,打倒褪,
斬柴坳,拉拉筋,落昂坪,好鬼扽,
為尋標,將路搵,幸功成,冇呻笨,
羌山道,坐一陣,食啲嘢,再起行。
觀音山,有路痕,上咗頂,就鬆人,
登羌山,無足印,過靈會,未留痕,
落狗嶺,訪廢標,在路邊,唔使搵,
分流頂,深坑瀝,冇上頂,係常人。
留實力,大磡森,不回走,向前行,
水澇漕,唔算近,路崎嶇,唯謹慎,
鼻涕瀑,已黃昏,再唔走,變新聞,
牙鷹山,時間抆,仲要上,好頭痕。
賈餘勇,將氣運,上到頂,振精神,
跑落山,唔使諗,飲啖水,似回魂,
也戒急,宜用忍,捱到底,入凡塵,
出大澳,搭巴士,返屋企,大覺瞓!

https://www.facebook.com/LiWaiOn/media_set?set=a.10223515561493247&type=3

二零二零年八月卅一日
石壁,中狗牙,斬柴坳,昂坪,污水處理廠山頭,百丈嶺,觀音山,羌山,靈會山,分水坳,引水道,狗嶺,狗嶺涌,分流頂,深坑瀝,大磡森,水澇漕,牙鷹山,大澳。(29.0km)

https://my.viewranger.com/track/details/MTU5NTMyMjE=
標準
遊記避疫嶼山景物介紹

寺在嶼山 (200907Facebook)

行雷閃電,地暗天昏,
唔驚橫風橫雨,最怕萬里無雲,
晨早東涌起步,好在有遮旁身。
般若禪寺深門禁,外圍偷拍冇盜心。
上到羅漢寺,又食閉門羹,
疫情再爆,謝絕遊人。
古佛禪寺諸多恩怨,外人怎辨絮果蘭因。
寶林寺撞啱禪七,想拜訪就要等陣。
昂坪寶蓮禪寺,冇哂貴客訪問,
何日疫情過去,得以撥霧開雲。
蓮池寺,喺左近,
山野之王曾跑過,如今寂寂已無聞。
海天一境牌坊後,護土牆頂倍驚心。
延慶寺轉營骨灰龕,入去參神就唔使諗,
觀音群像無人打掃,蛛網塵封失禮死神。
佛泉寺已成荒廢,庭前草地好多蚊。
重門深鎖大覺寺,未能一睹建築群。
青蓮寺係私人重地,狼狗做守門大將軍。
覺修寺國際禪院,日式風格好認真。
鹿湖古道下行靈隱,寺門大開不避世人,
登堂入室無人過問,大雄寶殿仲有觀音。
凌風石澗摩崖近,弘傳不朽石刻群。
大澳龍巗寺,八仙壁畫彩色繽紛,
朱大仙寶塔,紅牆綠瓦份外誘人。
萬丈布,慈興寺,粉飾之後,煥然一新,
揮彩筆,髹金身,飛龍形態,栩栩如生。
羌山觀音寺,防控疫情唔開放,
普渡撟上走,施妙計聖域同登。

山中易於藏古寺,世上難得遇明君,
良禽擇木宜審慎,豺狼當道禍黎民。
美酒應逢知己飲,好詩唔向俗人吟,
不喜百里陪人跑,只愛千山我獨行。

https://www.facebook.com/LiWaiOn/media_set?set=a.10223571464570789&type=3

二零二零年九月七日
東涌,石門甲,般若禪寺,羅漢寺,地堂仔,古佛禪寺,寶林寺,昂坪,寶蓮禪寺,蓮池寺,海天一境牌坊,大風坳,鹿湖,延慶寺,佛泉寺,鹿湖精舍,竹園,大覺寺,樂生蓮社,青蓮寺,覺修寺,下羌山,靈隱寺,弘傳不朽石刻群,大澳,龍巗寺,萬丈布,慈興寺,悟園,引水道,羌山,觀音寺,大澳道。(28.9km)

https://my.viewranger.com/track/details/MTYwNjM2MjI=
標準
遊記避疫嶼山景物介紹

嶼東天后 (200914Facebook)

  十二年前天后誕前夕,健行之友活動「嶼山天后」,走訪大嶼山九間天后廟,由愉景灣去到分流再返東涌,用咗十個半鐘。十二年後睇返條線,計一計數,就算畀我搭埋巴士都唔可以一日完成,折衷辦法,分開兩日玩囉!
  晨早出門,唔使半個鐘就去到每次過梅窩食飯都經過路口嘅長沙欄天后聖母廟,跟住去鹿地塘嗰間起喺私人地方,畀人封咗嘅天后元君古廟,鹿地塘以前有小型車路上通嶼南道,如今已被車場堵塞,冇咁方便。出碼頭食完早餐,借未開放嘅越野單車徑上圓角山,順手搵埋山頂兩枝標先經牛牯灣去拾塱。
  由沙灘涉水過天后廟,路程慳返唔少,小廟重建後,係企理咗,不過就少咗一份古樸。翻過拾塱坳落貝澳,又係另一間天后宮,裝修緊都照常開放。爲咗簡化行程,再度涉水過貝澳泳灘,雖然只係路過,但係都怕畀人趕,出嶼南道前搵個公園仔坐低開餐。
  食完接鳳徑,岔上南大嶼郊遊徑,青龍脊登二東,上咗無幾耐,背後雷鳴似腹,但係騎虎難下,惟有死撑到頂。霧雨交侵,速速走人,黃龍坑郊遊徑係唯一選擇,因為有間起機場嗰陣被重置喺現赤鱲角村嘅全石天后宮。跟手去埋馬灣涌,綑邊過海濱長廊返文東路公園,完成一日五間天后廟嘅行程。

https://www.facebook.com/LiWaiOn/media_set?set=a.10223631325747281&type=3

二零二零年九月十四日
愉景灣,長沙欄天后聖母廟,神樂院,梅窩,鹿地塘天后元君古廟(舊蹟),圓角山越野單車徑,圓角頂,禮智園,拾塱天后廟,貝澳天后宮,貝澳泳灘,青龍脊,二東山,黃龍坑郊遊徑,赤鱲角村天后宮,馬灣涌,東涌海濱長廊,文東路公園。(31.4km)

https://my.viewranger.com/track/details/MTYxNzY5MzI=
標準